Адбыліся выбары старшыні Казлоўшчынскага пасялковага Савета дэпутатаў 25 склікання. Стыршынёй Казлоўшчынскага пассавета абрана ВАЙТОВІЧ Людміла Леанідаўна, дэпутат ад Савецкай выбарчай акругі №7.
Людміла Леанідаўна Вайтовіч нарадзілася 18 снежня 1960 года ў вёсцы Гярбелевічы Дзятлаўскага раёна. У 1984 годзе закончыла Беларускі інстытут механізацыі сельскай гаспадаркі.
Працавала выхавальніцай, лабарантам,  выкладчыцай, намеснікам  дырэктара па вучэбнай рабоце ўстановы адукацыі “Казлоўшчынскі дзяржаўны сельскагаспадарчы прафесійны ліцэй”.
З 31 ліпеня 2009 года з’яўляецца старшынёй Казлоўшчынскага пасялковага Савета і выканаўчага камітэта.

Адбыліся выбары старшыні Парэцкага сельскага Савета дэпутатаў 25-га склікання. Старшынёй Парэцкага сельсавета абраны Уладзімір Уладзіміравіч ЖЫНКО, дэптат ад Кастрычніцкай выбарчай акругі №7.
Уладзімір Уладзіміравіч ЖЫНКО нарадзіўся 15 жніўня 1975 года ў вёсцы Бердаўка Навагрудскага раёна. У 1997 гадзе закончыў Гродзенскі дзяржаўны ўніверсітэт імя Янкі Купалы. Служыў у радах Узброеных Сіл Рэспублікі Беларусь.
Працаваў кіраўніком гурткоў Дзятлаўскай базы юных турыстаў, настаўнікам фізічнай культуры ўстановы адукацыі “Вучэбна-педагагічны комплекс “Хвінявіцкі дзіцячы сад-сярэдняя адукацыйная школа”.
З 20 сакавіка 2009 года з’яўляецца старшынёй Парэцкага сельскага Савета дэпутатаў і выканаўчага камітэта.

Весткі з Раготнаўскага сельсавета

Згодна Праграмы развіцця і адраджэння вёскі ў аграгарадку Раготна зроблена шмат. Заасфальтаваны вуліцы, пачала працаваць новая воданапорная вежа. Пасля капітальнага рамонту сучасны выгляд атрымалі школа, магазін. З’явіліся ў аграгарадку і новыя аб’екты – на пачатку бягучага года быў адчынены комплексны прыёмны пункт.
Цяпер ідзе будаўніцтва новай амбулаторыі. У планах – паставіць бетонную агароджу па цэнтральнай вуліцы.
“НОВАЕ ЖЫЦЦЁ“ ВОЗЕРА
Улюбёным месцам адпачынку не толькі для жыхароў Раготна і навакольных вёсак, але і для гасцей з’яўляецца Санніцкае возера. Доўгі час вадаём быў недагледжаны.
“Новае жыццё” возеру было дадзена ў мінулым годзе. Работнікамі Казлоўшчынскага ПМС вадаём быў пачышчаны, на ім устаноўлены шлюз. Цяпер возера зноў стала прыгожым і паўнаводным, радуе вока вяскоўцаў.
СВЯТЫ ВЁСАК
Летась у сельсавеце былі праведзены пяць святаў вёсак, чатыры канцэрты адбыліся ў маланаселеных і аддаленных вёсках. У мерапрыемствах былі задзейнічаны работнікі Раготнаўскага сельскага дома культуры, а таксама артысты мастацкай самадзейнасці раёна.                

СВЕТЛАЙ ПАМЯЦІ МУЗЫКАНТАЎ
На пачатку жніўня ў гарпасёлку Наваельня адбыўся традыцыйны марш духавога аркестра. Мерапрыемства было прысвечана памяці пайшоўшых з жыцця музыкантаў.
ДОБРАЎПАРАДКАВАННЕ ТЭРЫТОРЫІ
У Наваельні працягваецца добраўпарадкаванне тэрыторыі. Распачата асфальтаванне вуліцы Дзятлаўская. Таксама на гэтай жа вуліцы пачалася замена цеплавых сетак у дварах.
ЧАКАЮЦЦА НАВАСЕЛЛІ
У хуткім часе ў гарпасёлку адбудуцца наваселлі. У эксплуатацыю будзе здадзены 56-кватэрны дом.
ЗАЛАТЫЯ ЮБІЛЯРЫ
Нядаўна сваё залатое вяселле адзначылі жыхары Наваельні Іван Міхайлавіч і Лідзія Фёдараўна Трафімчыкі. З гэтай прыемнай падзеяй іх павіншавалі дзеці, унукі, суседзі, работнікі пасялковага выканаўчага Савета. Па традыцыі, Іван Міхайлавіч і Лідзія Фёдараўна пакінулі свае подпісы ў Ганаровай кнізе юбіляраў.
ВЯСЕЛЬНЫ БУМ
Гэты год (негледзячы на тое, што ён высакосны) для пассавета выдаўся багаты на вяселлі. За перыяд са студзеня па жнівень былі зарэгістраваны 13 шлюбаў. За ўвесь мінулы год іх было зарэгістравана толькі 8.
Павялічылася і нараджальнасць. За прайшоўшы перыяд 2008 года нарадзіліся 16 дзяцей. За ўвесь 2007 год гэтая лічба склала толькі 15 нованароджаных.
СВЯТА ПАСЁЛКА НАВАЕЛЬНЯ
Гарпасёлак адзначыць сваё свята. Падчас яго будзе арганізавана канцэртная праграма, удзел у якой прыме і духавы аркестр “Версалінка”.
А. ДУБРОЎСКАЯ.

ЗБОЖЖАСУШЫЛКА З “ЛІДСЕЛЬМАША”
У Пенчыцах пачалося будаўніцтва сучаснага высокапрадукцыйнага збожжасушыльнага комплекса айчыннай вытворчасці — восьмага па ліку на тэрыторыі СВК “Русь-Агра”. Яго неабходнасць тлумачыцца тым, што ў гаспадарцы запланавана павелічэнне валавай вытворчасці збожжа (план на 2008 год — 56 цэнтнераў з гектара). Да пачатку жніва новы комплекс збіраюцца ўвесці ў эксплуатацыю.
ТЭРЫТОРЫЯ СЕЛЬСАВЕТА ПАВЯЛІЧЫЛАСЯ
Напрыканцы мінулага года адбылося ўзбуйненне тэрыторыі сельсавета: да яго былі далучаны 10 вёсак з Вензавецкага сельсавета. Адпаведна на 642 чалавекі павялічылася і колькасць жыхароў. Усяго ў 32 вёсках Дзятлаўскага сельсавета жывуць 2505 чалавек, з якіх 1157 — працаздольных (633 мужчыны і 494 жанчыны), 936 пенсіянераў (299 мужчын і 637 жанчын), 412 дзяцей.

Пад такой назвай прайшоў Дзень Вензавецкага сельскага Савета. Яго наведалі прадстаўнікі райвыканкама на чале са старшынёй райвыканкама В. В. Грытчанкам, старшыні сельскіх і пасялковых выканаўчых камітэтаў, намеснікі старшыняў СВК раёна па ідэалагічнай рабоце.
Адкрыў семінар старшыня Вензавецкага сельвыканкама С. А. Шэцік.
На пачатку ўдзельнікі мерапрыемства наведалі Вензавецкі дзіцячы сад-сярэднюю школу. Пра работу, якая вядзецца па выхаванню ў дзяцей навыкаў здаровага ладу жыцця расказала дырэктар навучальнай установы Г. І. Франюк. Яна зазначыла, што з 2004 года школа працуе ў эколагавалеалагічным накірунку. Дзеля выхавання ў дзяцей здаровага ладу жыцця створана служба здароўя, экалагічны цэнтр, праводзяцца ўрокі здароўя. Адзін з іх наведалі ўдзельнікі семінару.

ДВАРЭЦКІЯ “НЕБАСКРОБЫ”
Нядаўна ў аграгарадку з’явіліся два вышынныя аб’екты. На тэрыторыі мехмайстэрняў з дапамогай сумеснага таварыства з абмежаванай адказнасцю “Мабільныя ТэлеСістэмы” была ўстаноўлена вышка базавай станцыі “Дварэц”. Яна дазволіць палепшыць магчымасці сотавай сувязі стандарту GSM. Хутка чакаецца падключэнне вышкі. Акрамя гэтага, згодна праграмы развіцця аграгарадка, была прабурана артэзіянская свідравіна глыбінёй 90 метраў і пабудавана воданапорная вежа вышынёй больш 30 метраў. Неўзабаве чакаецца яе ўвод у эксплуатацыю. Тады большая частка Дварца будзе забяспечана вадой.

У 2007 годзе ў Казлоўшчыне былі адрамантаваны некалькі аб’ектаў сацыяльна-бытавога прызначэння. Свой выгляд паманялі фасады магазінаў “Ручаёк”, “Шчара”, мясцовага Дома быту, аддзялення паштовай сувязі.
Значнай падзеяй для пасёлка стала адкрыццё бальніцы на 50 ложкаў ва ўрочышчы Урбанаўшчына. У хуткім часе тут з’явяцца яшчэ 25 сацыяльных ложкаў для адзінокіх грамадзян.
Пракладзены водаправод па вуліцах Валькова, Кастрычніцкая, Камсамольская. Жыхары ўжо карыстаюцца цэнтральным водазабеспячэннем.
У планах — пераабсталяваць будынак мясцовага ўнівермага, які нядаўна быў перададзены ў камунальную ўласнасць, і адкрыць тут клуб, бібліятэку, музычную школу.

У бліжэйшай будучыні ў Жукоўшчыне чакаецца ўкараненне цікавай і патрэбнай навінкі: з мэтай энергазберажэння тут збіраюцца ўстанавіць аўтаматычнае рэле часу для вулічнага асвятлення, якое будзе працаваць згодна зададзенай праграмы. Па словах старшыні Жукоўшчынскага сельсавета Мікалая Андрэевіча Дубіцкага, дзякуючы рэле вуліцы аграгарадка не будуць асвятляцца ў найменш патрэбны для людзей адрэзак сутак — з 12 гадзін ночы да паловы шостай раніцы. З дапамогай новаўвядзення ў Жукоўшчыне плануюць з’эканоміць да 50% расходу электраэнергіі. Такія ж рэле пазней з’явяцца і ў іншых вёсках сельсавета.

Весткі з Рудаяварскага сельсавета.
На базе ВПК “Рудаяварскі дзіцячы сад-сярэдняя школа” дзейнічае аб’яднанне “Школьнае лясніцтва”, якім кіруе дырэктар навучальнай установы Вадзім Аляксандравіч Палуносік. Ён расказаў, што мэтай дзейнасці аб’яднання з’яўляецца выхаванне любові і беражлівых адносін да лесу, да прыроды роднага краю. Акрамя тэарэтычных, на выдзеленай і замацаванай тэрыторыі ляснога фонду праводзяцца практычныя і выяздныя заняткі. Удзельнікі аб’яднання (а гэта 15 вучняў 8-11 класаў) працуюць па заданнях ДЛГУ “Дзятлаўскі лясгас” і, вядома, Рудаяварскага лясніцтва. Яны падтрымліваюць цесную сувязь з ляснічым Алегам Іванавічам Барысюком і памочнікам ляснічага Паўлам Аркадзьевічам Бузуком. Як паведаміў Вадзім Палуносік, у мінулым годзе школьнікі ўдзельнічалі ў пасадцы рэкорднай колькасці лесу — каля 50 гектараў, збіралі насенне, а ў зімовы час яны традыцыйна займаюцца падкормкай жывёлаў і птушак. У рамках “Школьнага лясніцтва” у гэтым навучальным годзе праводзяцца і навуковыя доследы па тэме “Матэматычная апрацоўка біяметрычных паказчыкаў сеянцаў хвойных парод”. Дарэчы, праграма, складзеная для дзейнасці аб’яднання, атрымала высокую ацэнку з боку ўпраўлення адукацыі Гродзенскага аблвыканкама і была адзначана дыпломам, як пераможца абласнога этапу рэспубліканскага конкурсу вучэбна-выхаваўчых праграм эколага-біялагічнага профілю. Па словах Вадзіма Аляксандравіча, на заняткі дзеці ходзяць з задавальненнем, і многія мараць звязаць свой лёс менавіта з лясной гаспадаркай.