У 2009 годзе Казлоўшчынская гарпасялковая дзіцячая бібліятэка стала пераможцай у абласным конкурсе “Бібліятэка — інфармацыйны цэнтр рэгіёна” ў намінацыі “Лепшая гарадская(гарпасялковая) бібліятэка”. Яна ўзнагароджана граматай праўлення культуры Гродзенскага абласнога выканаўчага камітэта і каштоўным падарункам.
У 2008 годзе Казлоўшчынская гарпасялковая дзіцячая бібліятэка рэарганізавана ў інфармацыйна-адукацыйны цэнтр.
Кніжны фонд біблітяэкі цяпер налічвае 24345 экзэмпляраў, што дае магчымасць задавальняць самыя розныя запыты 900 карыстальнікаў.
Каб пошук інфармацыі быў максімальна зручным, працуюць кніжныя выставы, афармляюцца паліцы. Работнікі бібліятэкі ў пастаянным пошуку новых кантактаў, інавацыйных формаў работы з чытачамі.
Аддзел бібліятэчнага маркетынгу
Дзятлаўскай цэнтральнай раённай бібліятэкі.

Прайшло пяць гадоў, як не стала выдатнага доктара, выдатнага паэта-лірыка Яўгена Матвеева. Вечар памяці паэта адбыўся 14 лютага ў Дзятлаўскай раённай бібліятэцы. Сюды прыйшлі сябры Яўгена Матвеева, проста аматары яго лірыкі.
Вечар пачаўся вершаванымі радкамі. Мясцовая паэтка Вера Хрышчановіч прачытала свой верш-прысвячэнне паэту. Сваімі ўспамінамі пра яго падзяліліся Мікола Грышан, Леанарда Юргілевіч, Раіса Лакіза. Георгій Шундрык прачытаў свае пераклады вершаў Яўгена Матвеева на беларускую мову. Аздабляла мерапрыемства меладычнае гучанне скрыпкі ў выкананні Аксаны Самохінай.
Яшчэ раз азнаёміцца з жыццёвым і творчым шляхам, прайсціся па тых мясцінах, дзе паэт жыў і ствараў вершы, дала магчымасць літаратурна-музычная кампазіцыя “Оправдывать трудом свой путь земной”.
Нізку вершаў Яўгена Матвеева, пранікнёных, лірычных, прачыталі вучні Дзятлаўскага дзіцячага дома Аляксандр Піліпчык, Дзмітрый Рышкевіч, Артур Яжоў, Яўген Ячмянёў.
Вучаніцы гімназіі № 1 г. Дзятлава Надзея Чарняк, Ангеліна Патрыхіна, Вікторыя Якубоўская азнаёмілі прысутных з даследаваннямі па творчасці Яўгена Матвеева, у якіх разглядаюцца вобраз Радзімы, філасофская тэма ў яго вершах.
А. ДУБРОЎСКАЯ.

Прыгажосць побач з намі, трэба толькі ўмець заўважаць. Жыхары гарпасёлка Казлоўшчына змаглі далучыцца да мастацтва на выставе работ з прыродных матэрыялаў слонімскай мастачкі, члена Беларускага саюза майстроў народнай творчасці, Надзеі Пятроўны Салейка. Гліна, лён, дрэва, разнастайныя каменьчыкі, сухацветы і карчагі – усё ў руках творцы становіцца шэдэўрам.
“Вельмі прыемна, – звярнулася Надзея Пятроўна да гасцей выставы, – наведваць такія невялікія населеныя пункты, як пасёлак Казлоўшчына. Тут жыхары не маюць столькі магчымасцяў наведаць экспазіцыі мастакоў, як у сталіцы або ў абласных цэнтрах, але маюць не меншую прагу духоўнага абагачэння і імкненне да прыгожага. Спадзяюся, наша выстава дапаможа вам спазнаць яшчэ адну грань народнага мастацтва і проста прыемна адпачыць.”
У чытальнай зале Казлоўшчынскай гарадской бібліятэкі гледачам была прадстаўлена экспазіцыя карцін з гліны на тэму дня. Вось традыцыйнае “Чаяванне” сабрала за прыбраным сталом сям’ю ў беларускіх нацыянальных касцюмах. Неахайны вадзіцель з іншага палатна не зважаў на дарожныя знакі і паплаціўся за гэта. Акрамя карцін, выстава ўключала творы дэкаратыўна-прыкладнога мастацтва, якія размясціліся па ўсёй прасторы чытальнай залы: на сталах, стэлажах, падлозе. Колішняя карчага стала багата ўпрыгожанай вазай, струхнелая яблыня – адмысловым куфэркам са скураной аздобай і нават унутраным люстэркам, з кары дрэваў, гліны, лёну паўсталі ліхтары, посуд і іншыя дзівосы. Муж Надзеі Пятроўны, па спецыяльнасці электраманцёр, так упадабаў жончына захапленне, што стаў не толькі актыўна ёй дапамагаць, але і сам вырабляць мастацкія творы.                                

Дзіцячая бібліятэка. Для хлопчыкаў і дзяўчынак гэта месца, дзе яны могуць сустрэцца з героямі любімых кніг, разам з імі павандраваць па розных гарадах і краінах, даведацца шмат новага і цікавага.
Цяпер Дзятлаўская дзіцячая бібліятэка мае добрае і ўтульнае памяшканне, вялікі кніжны фонд, які можа задаволіць розныя густы чытачоў. Магчыма, нашых чытачоў і іх бацькоў зацікавяць такія выданні:”Вялікая дзіцячая энцыклапедыя”,”Энцыклапедыя цікавых фактаў”,”Першая энцыклапедыя юнага знаўцы”,”Сучасная энцыклапедыя для хлопчыкаў і дзяўчынак”, “Энцыклапедыя краін і народаў свету”,”Аб усім на свеце”.
Самым маленькім наведвальнікам бібліятэкі мы прапануем пазнаваўчыя і цікавыя выданні:”Свет аўтамабіляў”, “Малая дзіцячая Чырвоная кніга”, “Энцыклапедыя для маленькіх джэнтльменаў”.
У дзяўчынак вялікім попытам карыстаюцца кнігі серый “Лепшыя кнігі для дзяўчынак”, “Твой першы раман”, “Толькі для дзяўчынак”. Аб першым каханні, сяброўстве, школьным жыцці паведамяць новыя кнігі І. Малчанавай “Каралева крывых люстэркаў”, А. Антонавай “Блюз начнога дажджу”, В. Златагорскай “Выдумшчык з трэцяй парты”, А. Іванова “Рыцар маскоўскай прынцэсы”.
У дзіцячай бібліятэцы ёсць шмат новых кніг рэлігійнай тэматыкі. Гэта — новае ілюстраванае выданне “Бібліі для дзяцей”, апавяданні Барыса Ганагі “Дотык да неба” і “Аб вобразе Божым”, кніга для сямейнага чытання Г. Юдзіна “Праваслаўныя святы”. Цікавасць у чытачоў выклікае таксама кніга Р. Балакшына “Выбраныя жыція святых для дзяцей”.
Звесткі аб праваслаўнай веры, святых іконах, пастах і святы можна знайсці ў кнізе Ф. Палачаніна “Школьнікам аб праваслаўнай веры”.
У дзіцячай бібліятэцы ёсць таксама і новая метадычная літаратура, якая прапануецца намеснікам дырэктараў па вучэбна-выхаваўчай рабоце, класным кіраўнікам, выхавальнікам, работнікам установаў культуры, кіраўнікам драматычных калектываў.
Напрыканцы варта дадаць: кніга дае новыя веды, вучыць жыць, дапамагае вырашыць складаныя пытанні, а таму трэба заўсёды ставіцца да яе з павагай.
Т.БАРЫСАВЕЦ,

Пад такой назвай у Дзятлаўскай раённай бібліятэцы працуе выстава, прымеркаваная да 70-годдзя Дзятлаўскага раёна. Яна будзе доўжыцца месяц.
На выставе прадстаўлены матэрыялы па гісторыі раённага цэнтра, вёсак, пра знакамітых людзей Дзятлаўскага раёна. Адзін з раздзелаў выставы прысвечаны літаратарам і паэтам Дзятлаўшчыны.
Большасць з матэрыялаў па гісторыі і краязнаўству дзятлаўскай зямлі сабраны работнікамі бібліятэкі. Увазе чытачоў прапанаваны і рэкамендацыйны бібліяграфічны спіс, дзе можна знайсці патрэбную інфармацыю па гісторыі раёна, спіс літаратуры.
А. ДУБРОЎСКАЯ.

30 снежня актавая зала СШ № 3 г. Дзятлава на некалькі гадзін ператварылася ў тэлевізійную студыю. Тут праходзілі здымкі навагодняга ранішніка для адораных дзяцей — інтэлектуальнай, спартыўнай,творчай эліты Дзятлаўшчыны. У студыі прысутнічалі як самі віноўнікі ўрачыстасці, так і госці — старшыня Дзятлаўскага райвыканкама В. В. Грытчанка, намеснік начальніка аддзела адукацыі райвыканкама А. І. Жадзейка, начальнік аддзела ідэалагічнай работы райвыканкама М. В. Мацюкевіч.
Віншавальную старонку адкрыў старшыня Дзятлаўскага райвыканкама В.В. Грытчанка. Ён пажадаў пераможцам раённых і абласных алімпіядаў, конкурсаў і фестываляў, лепшым юным спартсменам раёна ўпэўненасці ў сабе,настойлівасці, шчасця і радасці, міру і дабрабыту ў сем’ях, здзяйснення ўсіх мараў і жаданняў. Васіль Васільевіч запэўніў, што і надалей у раёне будуць прымацца меры па стварэнні аптымальных умоваў для развіцця таленавітай моладзі.
Віншаванні і словы падзякі за дасягнутыя поспехі дзеці прымалі ад намесніка начальніка аддзела адукацыі райвыканкама А. І. Жадзейкі. За падтрымку юных талентаў, інтэлектуалаў, спартсменаў яна падзякавала раённаму выканаўчаму камітэту.
У тэлевізійную студыю на навагодні ранішнік завіталі вядучыя многіх вядомых праграмаў: “Бітва тытанаў”, “Разумнікі і разумніцы”,” Інтуіцыя”, “Вялікі сняданак”,”Разгадай мелодыю”. Кожны з іх праводзіў з дзецьмі конкурсы, прапаноўваў адказаць на пытанні. А вядучая “Тэленяні” запрасіла дзяцей стварыць казку. Для гэтага ім неабходна было паспрабаваць сябе ў ролі казачных герояў.
Святочны ранішнік быў напоўнены музыкай і песнямі. У выкананні вучняў СШ № 3 гучалі хіты пра Новы год, зіму, добры настрой.
Доўгачаканым момантам свята стала з’яўленне ў студыі Дзеда Мароза і Снягуркі. Яны пажадалі дзецям здароўя, шчасця, як мага больш добрага настрою ў наступным годзе. Таксама Дзед Мароз і Снягурка правялі розыгрыш “Суперлато”, суперпрызам у якім стала плюшавае тыграня — сімвал надыходзячага года.
Ранішнік падарыў дзецям шмат прыемных хвілінаў, а таксама кожны з юных талентаў, інтэлектуалаў і спартсменаў атрымаў навагодні падарунак — мяккую цацку і салодкі пачастунак.
А. ДУБРОЎСКАЯ.

На Русі Новы год адзначалі 1 сакавіка і 1 верасня. Пётр Першы выдаў загад “с 1-го Генваря счисляти по-новому”. Святы доўжыліся амаль тыдзень. З таго часу пачалі забывацца, што гэта менавіта калядныя святы, калядныя канікулы.
У чаканні Ісуса чалавек задумваецца пра свае ўчынкі, змагаецца з грахамі.
За тыдзень да свята жыхары наводзяць у хатах узорную чысціню і парадак, мыюць падлогі і вокны, выкідваюць ці паляць старыя рэчы, нібы адцураючыся ад кепскага мінулага. Акрамя гэтага, хрысціяне наводзяць парадак у сваім жыцці, у сваёй душы, у сваіх адносінах з блізкімі людзьмі.
Тэме духоўнага выхавання прысвечана кніжная выстава “Ад нараджэння — да ўваскрэсення”, якая працуе ў Дзятлаўскай раённай бібліятэцы. Кнігі, прадстаўленыя на выставе, дапамогуць чытачам зазірнуць у духоўны свет, напоўніць свае душы чысцінёй і дабрынёй.
Чытачы могуць азнаёміцца са Свяшчэннай біблейскай гісторыяй, доказамі бессмяротнасці душы чалавечай, традыцыямі вялікіх святаў, жыццеапісаннем ігуменні і княгіні Полацкай Ефрасінні. З гісторыяй хрышчэння Русі пазнаёміць кніга з аднайменнай назвай, аўтарам якой з’яўляецца К. Бястужаў-Румін.
Выстава ўпрыгожана рэпрадукцыямі знакамітых мастакоў — П’етра Перуджына, Рафаэля, Барталамеа Эстэбан Мурыльо, Антоніа Карэдджо.
На выставе прадстаўлены і літаратура праваслаўных аўтараў на тэму сямейнага выхавання, здароўя. Чытачам прапанаваны “Гармонія ў сям’і і шлюбе” А. Марозавай, “Праваслаўная энцыклапедыя здароўя” А. Кузянкова, “Аб вельмі асабістым — з праваслаўным доктарам” К. Зорына, “У што гуляюць нашы дзеці. Цацка і антыцацка” В. Абраменкавай,”Ваша дзіця да года” Г. Калінінай, “Як выхаваць у дзіцяці адказнасць?” Т. Шышовай.
Аматарам мастацкай літаратуры прапануем кнігу І. Шмялёва “Лета Гасподне. Багамолле. Стары Валаам”.
Запрашаем наведаць бібліятэку, пазнаёміцца з прапанаванымі кнігамі па духоўным выхаванні,”чтобы познать мудрость и наставление, понять изречение разума; усвоить правила благоразумия, правосудия, суда и правоты.”( Біблія. Кніга прытчаў цара Саламона).
Л. ШЫЦЬКО,
загадчыца аддзела абслугоўвання і інфармацыі Дзятлаўскай цэнтральнай бібліятэкі.

Мы жывем у імклівы час, час важных пераўтварэнняў. Паўстае пытанне: як за ўсім паспець, пра ўсё даведацца? Дапамогуць у гэтым часопісы і газеты, галоўная задача якіх — знаёміць людзей з тымі падзеямі, якія адбываюцца ў краіне, за яе межамі.
Чытачам Дзятлаўскай дзіцячай бібліятэкі мы прапануем газету “Зорька”, якая ў наступным годзе адзначыць сваё 65-годдзе. Газета выдаецца са студзеня 1945 года, выходзіць раз на тыдзень — па пятніцах. На працягу многіх гадоў яна застаецца сімвалічным караблікам дзяцінства, які плыве туды, дзе дзеці вучацца, адпачываюць, сябруюць, мараць. Газета і ў вучобе дапаможа падцягнуцца, і на інфармацыйнай гадзіне выручыць. Яна дапаможа знайсці сяброў у Беларусі і іншых краінах. На старонках “Зорьки” таксама друкуюцца вясёлыя коміксы, смяшынкі, хітрыя пытанні.
Увазе маленькіх чытачоў мы таксама прапануем “Классный журнал”– дзіцячы пазнаваўчы штотыднёвік. У ім можна знайсці разнастайныя фокусы, рэцэпты выпечкі, соннік, тэсты. Да таго ж ёсць пазнаваўчыя старонкі, коміксы, рэбусы, карысныя парады, конкурсы з прызамі. У гэтым часопісе адкрыта рубрыка “Самы-самы”, якая прапануе віктарыны для самых начытаных, разумных, уважлівых.
Аматарам і знаўцам тэхнікі будзе цікава пагартаць часопіс “Левша”. На яго старонках вы зможаце знайсці мадэлі для зборкі рознай тэхнікі, стаць удзельнікам конкурсу вынаходнікаў.
Шмат яшчэ цікавых часопісаў і газет выпісвае дзіцячая бібліятэка. Запрашаем дзяцей у вандроўку па старонках перыядычных выданняў.
Набліжаецца новы год. У Дзятлаўскай дзіцячай бібліятэцы пачнецца перарэгістрацыя чытачоў. Мы запрашаем нашых юных наведвальнікаў пабываць у бібліятэцы, здаць кнігі, якія затрымалі ў сябе,удакладніць свае дадзеныя, і, вядома ж, пацікавіцца газетамі, часопісамі, кнігамі. Нагадваем наш адрас: г. Дзятлава, вул.Кірава, 12. Тэлефон — 21-3-53.
А.ХРЫШЧАНОВІЧ,
бібліятэкар Дзятлаўскай дзіцячай бібліятэкі.

Пад такой назвай прайшоў конкурс летняга чытання ў Казлоўшчынскай гарпасялковай дзіцячай бібліятэцы. Ён быў прымеркаваны да Года роднай зямлі. Удзельнікам конкурсу неабходна было разгадаць крыжаванку “Хто яны”, правільна адказаць на пытанні віктарыны “Знаўца беларускай казкі”, скласці верш або намаляваць малюнак на тэму “Фарбы роднай зямлі”. Адно з заданняў было прымеркавана да 600-годдзя Белавежскай пушчы.
Па выніках конкурсу яго пераможцамі сталі Ангеліна Ганчарук і Вікторыя Адамчык. Таксама варта адзначыць і іншых удзельнікаў конкурсу летняга чытання — Рэгіну Кузьміч, Сняжану Макарэвіч, Алесю Лазута, Маргарыту Літвінскую, Дзіяну Добыш.
Пераможцы конкурсу адзначаны падарункамі, астатнія ўдзельнікі атрымалі памятныя сувеніры.
Н.ЦЫНС,
загадчыца Казлоўшчынскай гарпасялковай дзіцячай бібліятэкі.

“Ад прадзедаў спакон вякоў нам засталася спадчына…” І неад’емная частка яе – родная мова. Яна не проста сродак зносін, у мове адлюстроўваецца ўвесь накоплены духоўны вопыт многіх пакаленняў, светапогляд народа.
Беларуская мова – гэта мова Францыска Скарыны, Міколы Гусоўскага, беларускага златавуста Кірылы Тураўскага, Янкі Купалы і Якуба Коласа, Максіма Багдановіча. Гэтыя людзі пісалі на роднай мове, стваралі яе. Для нас, сваіх нашчадкаў.
Кожны з нас павінен ведаць роднае слова, плённа вывучаць яго. У многім пачатак гэтаму даюць настаўнікі, якія вучаць нас паважаць родную мову, любіць яе. Адбываецца гэта падчас урокаў мовы і літаратуры, пазакласных мерапрыемстваў. Традыцыйным мерапрыемствам стаў і Тыдзень беларускай пісьменнасці і друку.
– Звычайна Тыдзень беларускай пісьменнасці стартуе на ўрачыстай лінейцы, прымеркаванай да пачатку новага навучальнага года, – расказвае метадыст раённага метадычнага кабінета аддзела адукацыі Дзятлаўскага райвыканкама Н.А.Каско. – Акрамя гэтага, на працягу ўсяго навучальнага года ва ўстановах адукацыі праводзяцца тыдні, дэкады беларускай мовы і літаратуры. Падчас гэтых мерапрыемстваў дзеці далучаюцца да роднага слова, на якім стваралі свае творы знакамітыя беларускія песняры.
Адзначу, што на Беларусі заўсёды шанавалі кнігу і друкаванае слова. Пра гэта сведчыць уся амаль што 500-гадовая гісторыя беларускага кнігавыдання, пачынаючы ад Псалтыра і Бібліі нашага слыннага першадрукара Францыска Скарыны. І сёння на пачатку трэцяга тысячагодзя, кніга дастойна вытрымлівае канкурэнцыю з іншымі сучаснымі электроннымі носьбітамі інфармацыі.
Сведчанне таму — свята беларускага пісьменства і друку, якое з’яўляецца яркай часткай духоўнага жыцця краіны. Сёлета яно праходзіць у сімвалічны для Беларусі год – Год роднай зямлі. Таму першы ўрок у 2009-2010 навучальным годзе пройдзе пад назвай “Зямля бацькоў – мая зямля”.
Ужо цяпер бібліятэкарамі ўстановаў адукацыі раёна вядзецца работа па афармленню выставаў, прымеркаваных да Тыдня беларускай пісьменнасці. Сярод мерапрыемстваў, якія праходзяць падчас яго, найбольш распаўсюджаныя завочныя падарожжы, краязнаўчыя віктарыны, конкурсы малюнкаў, літаратурныя гасцёўні. Шматлікія мерапрыемствы прысвячаюцца славутым постацям нашага краю. Вучні знаёмяцца з іх жыццёвым шляхам, тымі справамі, якія здзейснілі яны ў гонар сваёй Радзімы.