Пачатак 2009/2010 навучальнага года для выхаванцаў Дзятлаўскага дзяржаўнага цэнтра карэкцыйна-развіваючага навучання і рэабілітацыі пачаўся з прыемнай падзеі. У Дзень ведаў урачыста адкрыўся новы будынак гэтай установы адукацыі. Фінансавая дапамога ў яе будаўніцтве і рэканструкцыі была аказана грамадскімі арганізацыямі з Люксембурга — “Сябры Дзятлава” і “Сябры ахвяраў Чарнобыля”.
На ўрачыстым адкрыцці цэнтра карэкцыйна-развіваючага навучання і рэабілітацыі прысутнічалі старшыня Дзятлаўскага райвыканкама В. В. Грытчанка, начальнік аддзела адукацыі С. Б. Фабішэўскі, начальнік упраўлення спецыяльных работ г. Дзятлава ААТ “Будкомплекс” А. А. Тарасевіч, начальнік Дзятлаўскага РУП “Праектна-архітэктурнае планіровачнае бюро” Э.Ф. Голуб.
На пачатку ўрачыстай лінейкі да Дня ведаў пад гукі гімна Рэспублікі Беларусь быў падняты Дзяржаўны сцяг. Гэтае права было прадастаўлена вучаніцы 8 класа Любові Падліпскай і яе настаўніцы Кацярыне Валянцінаўне Дзісь.    

Восень. Пачатак новага навучальнага года, новых дасягненняў і поспехаў у адукацыі. Пра планы і задачы на 2009-2010 год, вынікі і напрацоўкі мінулага навучальнага года ішла гаворка на традыцыйнай жнівеньскай нарадзе педагогаў, якая адбылася на мінулым тыдні ў Дзятлаўскім раённым доме культуры.
Незадоўга да пачатку мерапрыемства ў файе Дома культуры педагогі раёна знаёміліся з выставай дэкаратыўна-прыкладнога мастацтва вучняў школ раёна, фотавыставай, прымеркаванай да Года роднай зямлі. Цікавілі настаўнікаў і метадычныя напрацоўкі сваіх калег – менавіта гэтаму была прысвечана выстава “З вопыту работы педагогаў раёна”.
Між сабой настаўнікі таксама абмяркоўвалі вынікі мінулага года, выказвалі погляд на год наступны.
– Новы навучальны год пачынаю з добрым настроем, — гаворыць Н.Р. Буйко, настаўніца хіміі СШ №1, – 2009-2010 – год асаблівы. Працягваецца пераход на 11-гадовы тэрмін навучання. Дзецям, якія займаюцца ў 11-ых штрых класах неабходна за адзін год асвоіць праграму двух гадоў. Таму галоўная задача, якая стаіць сёння перад намі – даць магчымасць дзецям рэалізавацца, каб яны змаглі паспяхова паступіць.
Для маладых спецыялістаў 2009-2010 навучальны год з’яўляецца толькі пачатак педагагічнага шляху, адчувалі неадназначныя пачуцці.
– Адчуваю невялікі страх і ў той жа час цікавасць, — гаворыць А.В.Даргевіч, педагог-псіхолаг СШ №1 г.Дзятлава. – Гэта наш першы педагагічны вопыт. Ва ўніверсітэце мы атрымлівалі тэарэтычныя веды, цяпер мы зможам праверыць іх на практыцы.
У глядзельнай зале педагогаў раёна павітаў начальнік аддзела адукацыі райвыканкама С.Б.Фабішэўскі. Ён павіншаваў настаўнікаў з пачаткам новага навучальнага года, пажадаў ім здароўя, энергіі, творчых поспехаў.
Па традыцыі, на пачатку жнівеньскай педагагічнай нарады ва ўрачыстай абстаноўцы ў шэрагі настаўнікаў раёна прымалі маладых спецыялістаў. Сёлета на працу ў наш раён прыйшло 30 маладых настаўнікаў, 21 чалавек з іх – ураджэнцы Дзятлаўшчыны.  

Адчыняю дзверы дзятлаўскай гімназіі: ўсё такое роднае, знаёмае… Два гады назад вучылася тут, атрымлівала веды, а зараз заходжу сюды ў якасці карэспандэнта. Мяне сустракаюць пах фарбы (летам, як заўсёды, рамонт) і ветлівыя вахцёры.
Падымаюся па прыступках на другі паверх – адразу кідаюцца ў вочы новыя дзверы кабінетаў. Больш нічога не змянілася, усё як і было, толькі ўжо далёкае мне, трохі чужое. А вось і дырэктар гімназіі – Грынчук Ігар Мікалаевіч – распараджаецца наконт рамонту з падначаленымі, думаю, што ён мне ўсё і раскажа…
І сапраўды, Ігар Мікалаевіч паведаміў пра ўсё, што датычыцца гімназічнага жыцця: якія змены адбыліся, якія планы на наступны год, што цікавае праходзіць у гімназіі кожны год, што ўжо стала традыцыяй, чым ганарацца гімназісты і настаўнікі, якія праблемы вырашаюцца ў сценах школы. Але пра ўсё па парадку…
Што змянілася ў гімназіі? Па-першае, у 2008-2009 навучальным годзе адпаведна Дэкрэта Прэзідэнта Рэспублікі Беларусь № 15 “ Аб асобных пытаннях агульнай і сярэдняй адукацыі” і “Адзінага тыповага вучэбнага плана” замест профіляў уведзены напрамкі ў дзесятых і адзінаццатых класах. Мульты-профілі адменены, зараз усе школы маюць адну вучэбную праграму, таму ў выпускнікоў ёсць роўныя магчымасці на працягу вучобы і ўвогуле на цэнтралізаваным тэсціраванні.
Па-другое, у параўнанні з 2007-2008 навучальным годам паменшылася на 28 колькасць вучняў гімназіі. У 2008-2009 навучальным годзе ў гімназіі вучылася 258 дзяцей (14 класаў).
Па-трэцяе, змяніўся рэйтынг якасці адукацыі па гімназіі. У гэтым годзе ён павялічыўся на 0,15 бала ў параўнанні з мінулым годам і дасягнуў 8,45 бала. 39 вучняў з 47 паступілі у ВНУ краіны. Хоць гэты паказчык меншы, чым у мінулых навучальных гадах, але ёсць чым ганарыцца. Вышэйшыя навучальныя ўстановы, якія выбралі выпускнікі, прэстыжныя і папулярныя, у асноўным гэта медыцынскія, эканамічныя і тэхнічныя напрамкі. У 2008-2009 навучальным годзе было два вучні-медалісты, 31 — закончылі навучальны год на выдатна.    

Паводле Статута навучальных устаноў, прынятага 5 лістапада 1804 года, у сельскай мясцовасці Беларусі пачалі адчыняцца царкоўнапрыходскія школы і школы граматы. Яны адносіліся да ніжэйшага тыпу агульнаадукацыйнай пачатковай школы і ствараліся для дзяцей сялян, сярод якіх панавала масавая непісьменнасць.
На Дзятлаўшчыне ўсе царкоўнапрыходскія школы і школы граматы былі агульнага тыпу (у іх маглі вучыцца і хлопчыкі, і дзяўчынкі). У гэтых катэгорыях школ дзеці праходзілі аднолькавыя прадметы: Закон Божы, рускую і царкоўнаславянскую мовы, чытанне, чатыры першыя дзеянні арыфметыкі, царкоўныя спевы. Мэты царкоўнапрыходскіх школ і школ граматы Дзятлаўшчыны, як і іншых рэгіёнаў Гродзеншчыны заключаліся ў тым, каб даць сялянскім дзецям элементарныя веды, навучыць іх пісаць, чытаць, лічыць, растлумачыць ім галоўныя ісціны веры ў Бога, царкоўныя погляды на з’явы прыроды і грамадства, укараніць у дзіцячую свядомасць духоўную мараль, выхаваць у школьнікаў паважлівыя адносіны да родных, блізкіх, улады, любоў да Радзімы.
Заняткі ва ўсіх царкоўных школах пачыналіся пасля заканчэння палявых работ і пасьбы жывёлы. Працягваліся да пачатку новых сельскагаспадарчых работ, не больш шасці месяцаў. Настаўнікі атрымлівалі грошы толькі за перыяд вучобы. У межах сучаснага Дзятлаўскага раёна на 1890-1891 вучэбны год, паводле царкоўных дакументаў, дзейнічалі наступныя царкоўнапрыходскія школы: Марозавіцкая і Стараельнянская; рухомыя школы граматы: Заройская, Лезнявіцкая, Яцвезьская.
Марозавіцкая царкоўнапрыходская школа была заснавана ў 1886 годзе ў сяле (цяпер вёска) Марозавічы. Утрымлівалася на сродкі мясцовай сялянскай абшчыны. Размяшчалася ў прасторным спецыяльна зробленым на сродкі сялян будынку. Загадчыкам школы з’яўляўся свяшчэннік тутэйшай прыходскай царквы Міхаіл Сырніцкі. На 1890-1891 вучэбны год у школе займаліся 38 хлопчыкаў і адна дзяўчынка. Марозавіцкая царкоўнапрыходская школа лічылася адной з лепшых прыходскіх школ. У ёй былі створаны добрыя па таму часу ўмовы для вучобы і выхавання дзяцей. У школе была свая бібліятэка, дзе мелася шмат падручнікаў, вучэбных дапаможнікаў, кніг для пазакласнага хатняга чытання. Пры школе існаваў невялікі інтэрнат, дзе зімой жылі дзеці з аддаленых вёсак і хутароў. Бацькі дастаўлялі прадукты, якія захоўваліся ў агульнай кладоўцы, а кухарка гатавала з іх стравы. Дзеці елі за агульным сталом. У Марозавіцкай царкоўнапрыходскай школе галоўная ўвага надавалася духоўнаму выхаванню дзяцей. Тут быў створаны з вучняў царкоўны хор. Настаўнікі і святары наладжвалі святочныя і нядзельныя духоўныя чытанні, у час якіх прысутнічалі не толькі вучні, але і дарослыя, а таксама дзеці, якія не вучыліся ў школе.                              

Пачаўся новы навучальны год. Для сваіх выхаванцаў зноўку гасцінна адчынілі дзверы ўстановы адукацыі раёна, а таксама — пазашкольныя ўстановы. Гэта – Дзятлаўскі дом дзіцячай творчасці, Казлоўшчынскі эколага-біялагічны цэнтр і Дзятлаўскі цэнтр турызму і краязнаўства. На іх прэзентацыі пабывала карэспандэнтка раённай газеты.
Мерапрыемства, якое сабрала вучняў школ Дзятлава, дало ім магчымасць азнаёміцца з дзейнасцю пазашкольных установаў, выбраць для сябе (у сувязі са сваім інтарэсамі) пэўны накірунак работы.
Першымі на прэзентацыі свае работы прадставілі навучэнцы Дзятлаўскага дома дзіцячай творчасці. Прыцягвалі ўвагу прысутных авіямадэлі, зробленыя з паперы і пластмасы, карціны-выцінанкі, прыгожыя сувеніры, ільняныя шляпкі і сумачкі. Сваё выканальніцкае майстэрства прадэманстравалі выхаванцы вакальных гурткоў Дома дзіцячай творчасці.
Далей у праграме быў прадстаўлены Казлоўшчынскі эколага–біялагічны цэнтр, гурткі якога (а іх ва ўстанове болей 30) маюць прыродазнаўчы накірунак. Дзеці пад умелым кіраўніцтвам настаўнікаў вучацца садаводству і кветкаводству, асновам экалогіі, прымаюць актыўны ўдзел у разнастайных акцыях, турнірах, конкурсах, КВЗ экалагічнага накірунку. Акрамя гэтага — спрабуюць сябе ў “Экалагічным тэатры”, падчас разнастайных экскурсій наведваюць цікавыя мясціны Беларусі, сустракаюцца з цікавымі людзьмі.                                              

(з даклада начальніка аддзела адукацыі Дзятлаўскага райвыканкама С.Б.Фабішэўскага)
У дзяржаўнай палітыцы сфера адукацыі разглядаецца як важнейшы стратэгічны рэсурс прагрэсу і вырашэння сацыяльна-эканамічных праблем. У 2008-2009 навучальным годзе перад школай пастаўлена новая задача – забяспечыць для ўсіх грамадзян аднолькавыя магчымасці атрымання агульнай сярэдняй адукацыі, якія дазволяць ім атрымаць якасныя веды і ў далейшым выбраць свой жыццёвы шлях, вывесці сістэму агульнай сярэдняй адукацыі на самы высокі ўзровень. У адпаведнасці з Дэкрэтам Прэзідэнта Рэспублікі Беларусь № 15 “Аб асобных пытаннях агульнай сярэдняй адукацыі” асноўным вынікам пераўтварэнняў з’яўляецца пераход да 11-гадовага тэрміну навучання.
У ЦЭНТРЫ ЎВАГІ — ДАШКОЛЬНАЯ І ПАЧАТКОВАЯ АДУКАЦЫЯ
У стварэнні адзінай адукацыйнай прасторы раёна асаблівая ўвага надаецца развіццю дашкольных установаў. Якасць дашкольнай адукацыі вызначаецца ў першую чаргу здароўем дзяцей, гарантыяй дасягнення кожным з іх узроўню развіцця, неабходнага для паспяховага навучання ў пачатковай школе. У мінулым навучальным годзе ў дашкольных ўстановах адукацыю атрымлівалі 1013 дзяцей, што складае 79% ад агульнай колькасці дзяцей ва ўзросце ад 1 да 6 гадоў, у сельскай мясцовасці — 74%.
На сённяшні дзень у раёне працуюць 2 Цэнтры развіцця дзіцяці, у 6 дашкольных установах адкрыты групы з 12-гадзінным рэжымам работы, у 15 – групы кораткачасовага знаходжання, у 5 – санаторныя групы. Шэсць дашкольных установаў маюць магчымасць аказання дапамогі дзецям з асаблівасцямі псіхафізічнага развіцця.
У дашкольных установах мэтанакіраваная работа вядзецца па стварэнню сістэмы аховы здароўя дзяцей. У 11 установах дашкольнай адукацыі арганізавана работа аздараўленчых гурткоў. Далейшае развіццё атрымалі летнія аздараўленчыя лагеры з кругласутачным знаходжаннем дзяцей. Дзякуючы выкананню патрабаванняў па арганізацыі рацыянальнага харчавання і рэжыму аздараўлення, паказчык пропускаў па хваробе адным дзіцём панізіўся з 3,43 дзён у 2006 годзе да 3 дзён у 2007 годзе. Гэта – адзін з лепшых паказчыкаў у вобласці.
Разам з тым, працэс стварэння сістэмы аховы здароўя ў дашкольных установах патрабуе далейшай увагі і вырашэння існуючых праблем. Аналіз паказвае, што 12% дашкольнікаў маюць адхіленні ў фізічным развіцці, 4% знаходзяцца на дыспансерным уліку, 5% належаць да ліку часта і доўга хварэючых дзяцей. Таму існуе неабходнасць у павышэнні якасці медыцынскага суправаджэння кожнага дзіцяці і стварэнні належных умоваў для ўмацавання здароўя.                                              

Прагучаў ён у Наваельнянскай школе для 38 першакласнікаў.
У пасёлку сёння асабліва ажыўлена. Дзеці спяшаюцца ў школу. Святочна апранутыя, з букетамі кветак збіраюцца яны ў школьным двары.
Асобнай купкай стаяць маладыя бацькі. Сёлета іх дзеці ідуць першы раз у першы клас.
– Хвалюецеся? – цікаўлюся ў Іны Уладзіміраўны Сташэўскай.
– Крышку, – адказвае матуля першакласніцы Настачкі Сташэўскай. — Ужо ёсць вопыт. Як-ніяк трэцяе дзіця адпраўляю ў школу.
– А дачушка вучыцца хоча?
– Так. Нават чытаць, пісаць умее, камп’ютар на свой узрост асвоіла. Мяркую, усё ў нас будзе добра.
– А чаго пажадаеце першаклашкам?
– Выдатных адзнакаў, расці разумнымі і здаровымі.                                                  

АДЗНАЧАНЫ
ГРАМАТАЙ МІНІСТЭРСТВА АДУКАЦЫІ
Юрый Васільевіч Скрабец, настаўнік фізкультуры Яварскай СШ;
ГАНАРОВАЙ ГРАМАТАЙ ГРОДЗЕНСКАГА АБЛАСНОГА ВЫКАНАЎЧАГА КАМІТЭТА
Інэса Яўгенаўна Кібінь, загадчыца раённага вучэбна- метадычнага кабінета;
ПАДЗЯЧНЫМ ПІСЬМОМ СТАРШЫНІ АБЛАСНОГА ВЫКАНАЎЧАГА КАМІТЭТА
Галіна Іванаўна Мілейка, намеснік дырэктара СШ № 1 г. Дзятлава;
ГРАМАТАЙ ГРОДЗЕНСКАГА АБЛАСНОГА САВЕТА ДЭПУТАТАЎ
Святлана Іванаўна Ванчук, настаўніца пачатковых класаў СШ № 3 г. Дзятлава;
ПАДЗЯЧНЫМ ПІСЬМОМ СТАРШЫНІ АБЛАСНОГА САВЕТА ДЭПУТАТАЎ
Аляксандр Станіслававіч Бараноўскі, дырэктар Наваельнянскай СШ;
ГАНАРОВАЙ ГРАМАТАЙ УПРАЎЛЕННЯ АДУКАЦЫІ ГРОДЗЕНСКАГА АБЛВЫКАНКАМА
Людміла Вацлаваўна Барысевіч, выхавальніца Казлоўшчынскага я/с;
Алена Мікалаеўна Баклага, метадыст аддзела адукацыі Дзятлаўскага райвыканкама;
Наталля Канстанцінаўна Варган, настаўніца пачатковых класаў СШ № 3;
Аляксандр Іванавіч Васюкевіч, дырэктар Раклевіцкага д/с-БШ;
Мікалай Валянцінавіч Губко, настаўнік хіміі гімназіі №1 г.Дзятлава;
Святлана Леанідаўна Гульнік, настаўніца інфарматыкі СШ №3 г. Дзятлава;
Ігар Уладзіміравіч Данільчык, дырэктар Малашастакоўскай БШ;
Галіна Генадзьеўна Дворык, намеснік дырэктара па выхаваўчай рабоце Круцілавіцкага д/с-СШ;
Іван Збышкавіч Кібінь, дырэктар СШ № 3 г. Дзятлава;
Ігар Станіслававіч Кухарэвіч, дырэктар Жукоўшчынскага ДЮСШ;
Аляксандр Мікалаевіч Кучынскі, намеснік дырэктара ДСЮШ;
Таццяна Міхайлаўна Манчук, настаўнік-дэфектолаг Дзятлаўскай школы-інтэрната;
Жанна Славаміраўна Нагавонская, настаўніца гісторыі гімназіі №1 г.Дзятлава;
Ала Рыгораўна Ненартовіч, бібліятэкар Гезгалаўскай гімназіі;
Святлана Аляксандраўна Стэцкая, намеснік дырэктара па вучэбна-выхаваўчай рабоце Жукоўшчынскага д/с-СШ;
Людміла Аляксандраўна Паўлюціна, настаўніца пачатковых класаў Наваельнянскай СШ;
Вадзім Аляксандравіч Палуносік, дырэктар Рудаяварскага д/с-СШ;
Алена Аляксееўна Русін, намеснік дырэктара па вучэбна-выхаваўчай рабоце Хвінявіцкага д/с-СШ;
Валянціна Уладзіміраўна Турок, настаўніца фізікі Наваельнянскай СШ;
Мікалай Іосіфавіч Юрчык, настаўнік фізкультуры Казлоўшчынскай СШ.
ГАНАРОВАЙ ГРАМАТАЙ РАЁННАГА ВЫКАНАЎЧАГА КАМІТЭТА І РАЁННАГА САВЕТА ДЭПУТАТАЎ
Ганна Мікалаеўна Герасімчык, настаўніца біялогіі і хіміі Горкаўскага д/с-БШ;
Людміла Міхайлаўна Герасімовіч, дырэктар Яварскай СШ;
Алена Яўгенаўна Ільюхіна, загадчыца Казлоўшчынскага яслі-сада.
ГРАМАТАЙ РАЁННАГА САВЕТА ДЭПУТАТАЎ І РАЁННАГА ВЫКАНАЎЧАГА КАМІТЭТА
Таццяна Мікалаеўна Курто, загадчыца ДЦРД я/с № 2 г. Дзятлава;
Людміла Міхайлаўна Ціхамірава, настаўніца рускай мовы Гезгалаўскай гімназіі;
Вольга Браніславаўна Чарняўская, настаўніца пачатковых класаў СШ №1 г. Дзятлава;
ПАДЗЯЧНЫМ ПІСЬМОМ СТАРШЫНІ РАЁННАГА ВЫКАНАЎЧАГА КАМІТЭТА
Алена Пятроўна Калнацкая, дырэктар Лявонавіцкага д/с- СШ;
Валянціна Мікалаеўна Шутава, настаўніца беларускай мовы Таркачоўскага д/с-СШ;
ПАДЗЯЧНЫМ ПІСЬМОМ СТАРШЫНІ РАЁННАГА САВЕТА ДЭПУТАТАЎ
Марыя Браніславаўна Антончык, настаўніца геаграфіі СШ № 3 г. Дзятлава;
Людміла Уладзіміраўна Лішык, дырэктар Казлоўшчынскай СШ;
Алена Іосіфаўна Лукіянец, намеснік загадчыца Гезгалаўскага я/с;
ГАНАРОВАЙ ГРАМАТАЙ АДДЗЕЛА АДУКАЦЫІ ДЗЯТЛАЎСКАГА РАЁННАГА ВЫКАНАЎЧАГА КАМІТЭТА
Ларыса Арсеньеўна Андрэева, выхавальніца Навельнянскага я/с;
Міхаіл Іванавіч Белавус, настаўнік матэматыкі Жукоўшчынскага д/с-СШ;
Рэна Сірусаўна Буйнец, намеснік дырэктара па вучэбнай рабоце Навельнянскай СШ;
Таццяна Іосіфаўна Галаднова, метадыст вучэбна-метадычнага кабінета аддзела адукацыі;
Людміла Казіміраўна Грынчук, загадчыца бібліятэкі СШ № 3 г. Дзятлава;
Ірына Казіміраўна Гуговіч, выхавальніца групы падоўжанага дня СШ №3;
Таццяна Казіміраўна Зенава, выхавальніца ДЦРД я/с № 2 г. Дзятлава;
Вера Іванаўна Мацыс, настаўніца нямецкай мовыТаркачоўскага д/с-СШ;
Ірына Мар’янаўна Мядзведзева, бібліятэкар гімназіі №1 г. Дзятлава;
Ірына Мікалаеўна Нічыпар, настаўніца пачатковых класаў Гезгалаўскай гімназіі;
Галіна Міхайлаўна Семярнік, настаўніца матэматыкі Круцілавіцкага д/с –СШ;
Марына Мар’янаўна Цілігузава, бібліятэкар Хвінявіцкага д/с-СШ;
Ганна Дзмітрыеўна Ціхановіч, настаўніца музыкі Наваельнянскай СШ;
Наталля Міхайлаўна Шыдла, педагог-псіхолаг Гезгалаўскай гімназіі;
Наталля Мікалаеўна Яравая, выхавальніца я/с № 1 г Дзятлава.

На мінулым тыдні ў Дзятлаўскім раённым доме культуры прайшла традыцыйная жнівеньская педнарада. Удзел у ёй прынялі кіраўнікі раёна, работнікі сістэмы адукацыі Дзятлаўшчыны. Сёлета на пасяджэнні прысутнічаў дэпутат Палаты прадстаўнікоў Нацыянальнага сходу Рэспублікі Беларусь М. С. Орда.
Першы павітаў прысутных у зале начальнік аддзела адукацыі Дзятлаўскага райвыканкама С. Б. Фабішэўскі. У сваёй уступнай прамове ён акрэсліў тыя пытанні, якія будуць разгледжаны падчас нарады, галоўная з якіх – пераход установаў адукацыі на 11-гадовы тэрмін навучання.
Па традыцыі, на пачатку нарады ва ўрачыстай абстаноўцы ў рады педагогаў Дзятлаўшчыны былі прыняты 37 маладых спецыялістаў, 28 з якіх з’яўляюцца ўраджэнцамі нашага раёна.
З наказам да маладых педагогаў звярнулася настаўніца рускай мовы і літаратуры Казлоўшчынскай СШ Г. І. Хілімончык:
– Сёння нашы рады папоўніліся маладымі педагогамі – аптымістычнымі, энергічнымі людзьмі з адкрытаю душою і неспакойным сэрцам. Перад кожным з іх стаіць шэраг пытанняў: ці будуць яны цікавыя дзецям, ці хопіць накопленых ведаў. І самае глаоўнае – ці змогуць яны пранесці праз усё жыццё нязгаснае полымя любові да дзяцей. Заўсёды памятайце, што нішто ў рабоце педагога не зможа замяніць дабрыні. Няхай жа кожны ваш дзень будзе напоўнены полымем дабрыні, якую вы будзеце дарыць дзецям. Няхай жа для вас запаведдзю жыцця стануць словы: “Калі жыць, то жыць сэрцам”. У добры шлях!”
У сваю чаргу Т. А. Герасімчык, настаўніца рускай мовы і літаратуры Хвінявіцкага сада-школы, ад імя ўсіх маладых педагогаў урачыста паабяцала даказаць на справе, што яны дастойныя высокага звання быць настаўнікам.                                      

Дзятлаўскі дом дзіцячай творчасці памяняў сваю прапіску. Цяпер ён размяшчаецца па вуліцы Кірава,13, у былым вучэбным корпусе школы-інтэрната. Як пачуваюць сябе навасёлы? Пра гэта карэспандэнт цікавіцца ў дырэктара ўстановы Г. Скрундзь.
— Ганна Сяргееўна, ці не шкада было пакідаць свой абжыты “церам-церамок”?
– Крышку. Тут прайшло, літаральна, усё маё працоўнае жыццё, тут (хоць і ў цеснаце, але не крыўдуючы) выраслі некалькі пакаленняў гурткоўцаў. Стараліся стварыць утульнасць, зацікавіць творчай працай дзяцей. Былі мы неаднаразова і сярод пераможцаў конкурсу на лепшую пазашкольную ўстанову. Але ўсё жыццё я марыла, каб дзеці і дарослыя займаліся ў прасторных аўдыторыях, каб было ў нас шмат месца для правядзення самых разнастайных мерапрыемстваў.
– І мара ажыццявілася?
– Так. Для Дома дзіцячай творчасці адведзены другі паверх былога вучэбнага корпуса школы-інтэрната. Цяпер мы маем прасторную актавую залу. Там будуць праходзіць заняткі харэаграфіяй, масавыя мерапрыествы. Яшчэ ў нашым распараджэнні шэсць светлых аўдыторый. Памяшканні ўжо набылі сваіх гаспадароў. Там кіраўнікі будуць ладзіць заняткі па дэкаратыўна-прыкладной творчасці, стэндаваму мадэляванню, бісерапляценню, цестапластыцы, вязанню, вышыўцы, музыцы. Адным словам, умовы ёсць, было б толькі жаданне ў дзяцей вучыцца карыснаму, цікаваму, прыгожаму.
– А хто з педагогаў асабліва рады пераезду?