Наша Духоўная школа рыхтуе будучых выкладчыкаў Закона Божага, кіраўнікоў царкоўных хораў, іконапісцаў. Гэта — адзіная ў Беларусі чыста жаночая духоўная навучальная ўстанова. Слонімскае Духоўнае вучылішча дапамагае маладым дзяўчатам знайсці свой шлях служэння Богу і людзям. Выхаванкі наведваюць хворых, адзінокіх пенсіянераў, дзяцей-сірот, праводзяць урокі Закона Божага ў школах і садках.
Цяпер Духоўнае вучылішча аб’яўляе набор выхаванак на 2008-2009 навучальны год. Тэрмін навучання тут — тры гады. Вучылішча мае тры аддзяленні — катэхізатарскае (рыхтуе выкладчыкаў Закона Божага), псаломнае (тут вучаць на кіраўнікоў царкоўных хораў), іконапіснае. На катэхізатарскім аддзяленні існуе завочная форма навучання.
У Духоўнае вучылішча прымаюцца асобы жаночага полу, праваслаўнага веравызнання, ва ўзросце 17-35 гадоў, якія маюць сярэднюю або вышэйшую адукацыю.
Дзяўчаты, залічаныя на вучобу, забяспечваюцца бясплатным харчаваннем, інтэрнатам, стыпендыяй.
Пасля заканчэння Слонімскага Духоўнага вучылішча выхаванкам прадастаўляецца магчымасць паступлення ў Маскоўскі сучасны інстытут кіравання. Закончыўшы яго, выпускніца атрымлівае дыплом дзяржаўнага ўзору, ёй прысвойваецца кваліфікацыя “Выкладчык-тэолаг, псіхолаг” з правам выкладання ў агульнаадукацыйнай школе.
Аб правілах паступлення, прыёме дакументаў у Слонімскае Духоўнае вучылішча можна даведацца, патэлефанаваўшы на нумар (8-01562)2-53-29, 2-51-09 або звярнуўшыся непасрэдна ў Духоўнае вучылішча. Наш адрас — г. Слонім, вул. Віленская, 26.
Рэктар Слонімскага Духоўнага вучылішча Гурый, архіепіскап Навагрудскі і Лідскі.

Калі вы збіраецеся сёлета паступаць у вышэйшую або сярэдне-спецыяльную навучальную ўстанову Беларусі на дзённую, завочную або вячэрнюю формы, то неабходна прайсці цэнтралізаванае тэсціраванне. Калі і як гэта зрабіць? На пытанні адказвае галоўны спецыяліст аддзела адукацыі райвыканкама Л. Саванец.
— Абітурыентам неабходна прайсці цэнтралізаванае тэсціраванне па трох (або двух) прадметах. Першы — дзяржаўная мова (беларуская або руская — па выбару абітурыента). Другі ці трэці прадметы — адпаведна профілю (накірунку) абранай абітураентам спецыяльнасці. Удзел у цэнтралізаваным тэсціраванні бясплатны. Тэсціраванне будзе праводзіцца адпаведна графіка.
— Ужо вядома, у якія дні будзе праводзіцца цэнтралізаванае тэсціраванне?
— Так. Па беларускай мове — 12 чэрвеня, рускай мове — 13 чэрвеня, па гісторыі Беларусі — 15 чэрвеня, сусветнай гісторыі навейшага часу — 17 чэрвеня, матэматыцы — 19 чэрвеня, па прадмеце “Чалавек. Грамадства. Дзяржава” — 21 чэрвеня, геаграфіі — 22 чэрвеня, фізіцы — 23 чэрвеня, біялогіі — 25 чэрвеня, замежных мовах — 27 чэрвеня, хіміі — 28 чэрвеня. Рэзервовы дзень прызначаны на 2 ліпеня.
Дарэчы, абітурыенты могуць прыняць удзел у цэнтралізаваным тэсціраванні не больш чым па трох прадметах.
— Людміла Васільеўна, дзе і па якіх прадметах будзе праходзіць цэнтралізаванае тэсціраванне?

У паўсядзённым уяўленні сацыялогія часцей за ўсё асацыіруецца з правядзеннем апытанняў, вывучэннем грамадскага меркавання, з паведамленнямі ў сродках масавай інфармацыі аб тым, колькі працэнтаў насельніцтва думае так, а колькі — інакш. Аднак на самой справе рэальны дыяпазон даследчага інтарэсу сацыёлагаў значна шырэй. Ён не зводзіцца толькі да правядзення масавых апытанняў з мэтай выяўлення меркаванняў людзей па той ці іншай праблеме.
Дзейнасць сацыёлага вельмі шматгранная. Гэта збор інфармацыі аб перавагах людзей пры выбары імі таго ці іншага кандыдата ў прэзідэнты краіны або спосабу зарабляць на жыццё да вывучэння прычын і наступтстваў злачыннасці ўнутрысямейных канфліктаў, распрацоўкі тэорый, якія растлумачваюць асаблівасці гістарычнага шляху народа, краіны, цывілізацыі. Разам з тым, нягледзячы на ўсю шырыню ахопу розных сфераў жыцця грамадства, у гэтай дзейнасці ёсць свая “ізюмінка”: яна дазваляе ўбачыць праблемы, спароджаныя сацыяльным узаемадзеяннем, знайсці шляхі і сродкі іх вырашэння, прапанаваць іх грамадству.

Адна з галоўных праблем беларускага аграпрамысловага комплексу - патрэба ў забеспячэнні зааветэрынарнымі кадрамі. Падчас прыёму дакументаў у вышэйшыя навучальныя ўстановы рэспублікі карэспандэнт пагутарыў з начальнікам ДУ “Дзятлаўская раённая ветэрынарная станцыя” Іванам Валянцінавічам Чырко.

- Іван Валянцінавіч, а наколькі Дзятлаўшчына забяспечана ветэрынарнымі кадрамі?

- На жаль, наш раён не выключэнне: гаспадаркі забяспечаны імі толькі на 70 працэнтаў. На пасадах галоўных ветурачоў працуюць спецыялісты з сярэдняй спецыяльнай адукацыяй. Зазначу таксама, што ў 10 СВК Дзятлаўскага раёна з 12 няма ветурачоў-гінеколагаў.

- Дзе маладыя людзі могуць набыць прафесію ветурача?

- У нас на Гродзеншчыне такіх навучальных установаў дзве. У Гродзенскім аграрным універсітэце некалькі гадоў таму адкрыты ветэрынарны факультэт. Дакументы прымаюцца на дзённую і завочную формы навучання. А ў Ваўкавыскім аграрным каледжы існуе спецыяльнасць “Ветэрынарны фельчар”, набыўшы якую чалавек атрымлівае сярэднюю спецыяльную адукацыю. Але асабліва вызначаецца Віцебская акадэмія ветэрынарнай медыцыны: гэтая навучальная ўстанова нават заснавала свой філіял у горадзе Рэчыца.

- Чым жа яшчэ вызначаецца Віцебская акадэмія?

- У гэтай установе ёсць два факультэты: ветэрынарнай медыцыны, на якім рыхтуюць урачоў ветэрынарнай медыцыны агульнага профілю і са спецыялізацыямі “Ветэрынарна-санітарная экспертыза”, “Гінекалогія і біятэхналогія размнажэння жывёлаў”, “Ветэрынарная бактэрыялогія і вірусалогія”, “Хваробы птушак”, “Хваробы свіней” і зааінжынерны, на якім вядзецца падрыхтоўка зааінжынераў агульнага профілю і са спецыялізацыямі “Племянная справа” і “Птушкагадоўля”. На абодвух факультэтах для выпускнікоў зааветэрынарных каледжаў ёсць групы бесперапыннай інтэграванай сістэмы прафесійнага навучання (БІСПН). Тым, хто паступіў на спецыялізацыю “Ветэрынарна-санітарная экспертыза”, можна будзе перавесціся на ветэрынарна-санітарны факультэт пасля яго адкрыцця. Выпускнікам гэтага факультэта прысвойваецца кваліфікацыя ветэрынарна-санітарнага ўрача. З 12 па 29 ліпеня акадэмія прымае дакументы на дзённую форму навучання, а з 31 ліпеня па 4 жніўня тут праводзяцца вусныя экзамены па хіміі (для паступаючых на поўны тэрмін навучання) і спецпрадметах (для групаў БІСПН). Абітурыента, які не прайшоў па конкурсу, могуць залічыць на ўмовах аплаты. Іншагародніх абітурыентаў і студэнтаў забяспечаць інтэрнатам. Даведкі можна атрымаць па тэлефонах (8-0212)37-23-22, 37-33-32.

- Што вы можаце сказаць тым юнакам і дзяўчатам, якія яшчэ вагаюцца і могуць падаць дакументы ў адну з названых вамі навучальных устаноў?

- Магу сказаць, што выпускнікі, якія прыедуць на работу ў любую гаспадарку раёна, абавязкова будуць забяспечаны жыллём. Безумоўна, у ветэрынара - цяжкая работа. Як і чалавеку, хворай жывёле патрэбна дапамога і днём, і ноччу. І яшчэ памятайце: урач лечыць людзей, а ветэрынарны ўрач - чалавецтва, таму што да больш чым 100 хваробаў схільныя і людзі, і жывёлы.

А. НІЧЫПАР.