Самыя цёплыя віншаванні з нагоды юбілейнага Дня нараджэння прымі, дарагая наша, любая мамачка, бабуля
Марыя Антонаўна
ГЕРАСІМОВІЧ!
Вашы гады – для ўсіх багацце,
Не першы гэта юбілей.
Хай плодна, мёдна будзе ў хаце,
А ў сэрцы – планаў шмат, надзей.
Знайсці рашэнне ўсім на радасць,
Жыццём пастаўленых задач,
Хай не падходзіць блізка старасць,
Дык – моцы, поспехаў, удач.
З любоўю дзеці, зяць, нявестка, унукі

19 студзеня — Дзень ратаўніка

11 верасня 1998 года Прэзідэнт Рэспублікі Беларусь А. Р. Лукашэнка падпісаў Указ №442, на падставе якога ваенізаваная пажарная служба была выведзена са складу Міністэрства ўнутраных спраў і далучана да Міністэрства па надзвычайных сітуацыях.
Як пастаўлена служба ратаўнікоў сёння? Як працуюць работнікі Дзятлаўскага раённага аддзела па надзвычайных сітуацый? Аб гэтым расказвае начальнік аддзела Уладзімір Аляксандравіч Нячаеў:
– Дзятлаўскі аддзел сёння — гэта наладжаны механізм, гатовы ў любую хвіліну прыступіць да ліквідацыі надзвычайнай сітуацыі. Яго складаюць пяць аварыйна-выратавальных падраздзяленняў — адна аварыйна-выратавальныя часць і чатыры пасты. Раённы аддзел па надзвычайных сітуацыях налічвае 77 чалавек, 18 з іх кругласутачна знаходзяцца на варце бяспекі людзей.
Сёння немалаважную ролю адыгрывае прафілактычная работа сярод насельніцтва раёна, на аб’ектах гаспадарання, навучанне людзей правілам пажарнай бяспекі. Напрыклад, толькі ў мінулым годзе праведзена планавая праверка больш за 70 аб’ектаў Дзятлаўшчыны, звыш за 20 тысяч праверак супрацьпажарнага стану жылых дамоў, дачаў. Поспеху ў барацьбе з надзвычайнымі сітуацыямі садзейнічае і пастаяннае павышэнне прафесійнай кваліфікацыі работнікаў раённага адддзела МНС на спецыяльных вучэннях і занятках, якія штогод праходзяць ратаўнікі.
А вось з мэтай папулярызацыі гэтай прафесіі сярод моладзі, яе патрыятычнага выхавання ва ўсіх абласцях Беларусі штогод арганізоўваюцца палявыя профільныя лагеры. Актыўна дзейнічае Беларуская моладзевая грамадская арганізацыя ратаўнікоў-пажарных.
Ва ўстановах адукацыі нашага раёна створаны і працуюць клубы юных ратаўнікоў. Папулярызацыі гэтай прафесіі сярод дзяцей і падлеткаў, навучанню іх правілам пажарнай бяспекі, бяспекі ўвогуле садзейнічае газета “Юны ратаўнікоў”.
Час не стаіць на месцы, дыктуе свае патрабаванні. У кожнай сферы дзейнасці пастаянна павышаецца ўзровень тэхнічнага аснашчэння, выкарыстоўваюцца камп’ютарныя тэхналогіі, удасканальваецца прававое рэгуляванне дзейнасці. Гэта ж датычыцца і работы Міністэрства па надзвычайных сітуацыях Рэспублікі Беларусь, якое за час свайго існавання заваявала заслужаны аўтарытэт сярод людзей, стала сімвалам дапамогі. Гэты сэнс закладзены ўжо ў самой назве прафесіі — “ратаўнік”. Ахвяраванне дзеля абароны чалавечага жыцця з’яўляецца галоўным маральным крытэрыям нашай прафесіі — такой складанай, небяспечнай, але вельмі патрэбнай. З нагоды прафесійнага свята сваім калегам, работнікам раённага аддзела па надзвычайных сітуацыях жадаю здароўя, цвёрдасці духу, спакойных будняў і выхадных, сямейнага дабрабыту, радасці і цеплыні, поспехаў у прафесійнай дзейнасці.
Падрыхтавала А. Гоман

12 студзеня ў 11 гадзін 30 хвілін у аператыўна-дзяжурную службу аддзела ўнутраных спраў Дзятлаўскага райвыканкама паступіла паведамленне аб тым, што ў хату да аднаго з жыхароў вёскі Дварэц праз незачыненую фортку залез злодзей. Ён скраў буйную суму грошай, золата, іншую маёмасць. На месца здарэння выехала следча-аператыўная група ў складзе следчага следчага камітэта А. М. Лазуты, оперупаўнаважанага аддзела крымінальнага вышуку В. В. Жамойдзіка, старшага эксперта М. М. Мікуліча, эксперта Г. А. Касянкова, участковага інспектара міліцыі С. В. Ігнаціка. У сувязі з тым, што было ўчынена рэзананснае злачынства, у Дварэц прыбыў начальнік упраўлення ўнутраных спраў Гродзенскага аблвыканкама В. У Міхневіч.
Следча-аператыўная група хутка сарыентавалася ў абстаноўцы. У час агляду месца здарэння былі выяўлены важкія доказы і арганізавана работа па вышуку зламысніка. У хуткім часе оперупаўнаважаным В. В. Жамойдзікам і інспектарам С. В. Ігнацікам быў затрыманы мясцовы жыхар, які падазраваўся ва ўчыненні крадзяжу. У далейшым у яго былі знойдзены і адабраны скрадзеныя грошы і рэчы. Затрыманы змешчаны ў ізалятар часовага ўтрымання. Вядуцца аператыўна-следчыя мерапрыемствы, накіраваныя на высвятленне ўсіх абставін злачынства.                 

Дзятлаўская дыягнастычная станцыя “Белтэхагляд” другі год запар стала пераможцай абласнога агляду-конкурсу. Традыцыйна конкурс праводзіўся на працягу ўсяго года, ацэньваліся тэхнічныя магчымасці станцый, падрыхтоўка спецыялістаў, віды паслуг і г.д. Удзел у спаборніцтве прынялі 32 станцыі Гродзеншчыны.
Наша станцыя прайшла немалы шлях у сваім развіцці, і цяпер яе тэхналогіі, пакет паслуг з’яўляюцца неад’емнай часткай якаснага абслугоўвання кліентаў – званне “Лепшая дыягнастычная станцыя – 2011” па-праву заваявана дзятлаўчанамі.
– Зразумела, важна, што сёння мы працуем у адрамантаваным будынку, маем сучаснае абсталяванне, якое дазваляе дасканала праверыць аўтамабіль, — расказавае начальнік станцыі Вячаслаў Якшэвіч, — аднак, я лічу, што гэта перамога – поўнасцю заслуга калектыву. Прафесійная падрыхтоўка работнікаў, іх адказнасць у рабоце, уважлівыя адносіны да пажаданняў кліента, асабліва ў пытаннях рамонту аўтамабіля, яшчэ некалькі гадоў таму “паставілі” нашу станцыю на прыступку аўтарытэтнай структуры. Цяпер жа мы робім усё магчымае, каб вытрымліваць якасць нашай работы і не страціць давер аўтамабілістаў.            

23 студзеня 2012 года на змену белым кітайскаму Кату і японскаму Трусу прыйдзе чорны вадзяны Дракон і, адпаведна, моднымі стануць чорныя камяні-самацветы, якіх у прыродзе даволі шмат.
Паколькі Дракон у новым годзе будзе не толькі чорным, але і вадзяным, то і камяні-самацветы года павінны быць не толькі чорнымі, але і ўтварацца ў вадзе або ўтрымліваць у сваім складзе ваду. Такія патрабаванні года Дракона. І прырода дала падарунак усім модніцам свету ў выглядзе чорнага жэмчугу, які ўтвараецца ў марах, і чорнага апалу, які ўтрымлівае ў сваім складзе ваду.
Варта адзначыць, што абодва камяні сустракаюцца ў прыродзе ў выглядзе белых, крэмавых, серабрыста-белых, светла-блакітных і нават вогненных таноў, але толькі чорныя – самыя прыгожыя, рэдкія і дарагія. Напрыклад, чорныя жамчужыны правільнай акруглай формы з металічным адлівам вельмі рэдкія і цэняцца вельмі высока, а вядомым чорным апалам з радовішчаў Аўстраліі месца толькі на музейных стэндах, асабліва узорам з чырванаватымі і сінімі блікамі.      

19 студзеня – Вадохрышча. Апошняе свята каляднага цыкла. У гэты дзень, калі згодна з праваслаўным календаром святкавалася хрышчэнне Ісуса Хрыста, асвячалася вада. Народ верыў у цудадзейную сілу такой вады і выкарыстоўваў яе пры розных бытавых выпадках і здарэннях: давалі выпіць хвораму, апырсквалі новую хату перад тым, як засяліцца, і вуллі, каб лепш вяліся пчолы, вадохрышчанскай вадою асвячалі поле перад сяўбою, труну, перш чым пакласці туды нябожчыка. У гэты дзень ужо дазвалялася выконваць некаторыя работы, забароненыя на працягу ўсіх Каляд. На Вадохрышча прыпадалі самыя вялікія маразы, пасля якіх зіма паступова пачынала паварочваць на лета. У народзе казалі: “Трашчы не трашчы, прайшлі вадахрэшчы – не к Ражству, а к Пятру”, маўляў, большых маразоў ужо не будзе. “На вадохрышчы дзень цёплы – будзе хлеб цёмны”.
Падрыхтаваў Т. КАРЫНА

У г. Слоніме 23 снежня 2011 года адбылося выязное пасяджэнне калегіі Камітэта дзяржкантролю
Гродзенскай вобласці па пытанні эфектыўнасці работы мясцовых выканаўчых і распарадчых органаў, арганізацый Слонімскага раёна па выкананні дзеючага заканадаўства.
Калегія адзначыла, што кіраўнікамі шэрагу арганізацый і ўстановаў раёна прымаюцца недастатковыя меры па выкананні нарматыўна-прававых актаў, не выконваецца пэўным чынам фінансавая дысцыпліна. Захоўваюцца негатыўныя тэндэнцыі ў прамысловасці, сельскай гаспадарцы, на спажывецкім рынку.
Па выніках работы за студзень-лістапад 2011 года не дасягнута выкананне прагнозных заданняў па колькасці занятых у эканоміцы, далучэнні інвестыцый арганізацыямі, якія падпарадкоўваюцца мясцовым Саветам дэпутатаў, выканаўчым і распарадчым органам, ці ў якіх яны ажыццяўляюць кіраванне акцыямі ў памеры больш за 50%, па росце вытворчасці валавой прадукцыі сельскай гаспадаркі, уводзе ў эксплуатацыю жылля, энергазберажэнні.          

У адпаведнасці з Указам Прэзідэнта Рэспублікі Беларусь ад 30 снежня 2011 года №616 “Аб узмацненні сацыяльнай падтрымкі асобных катэгорый грамадзян” з 1 студзеня 2012 года ўстаноўлены памеры дзяржаўных дапамог:
па доглядзе дзіця-інваліда ва ўзросце да 18 гадоў – 100% найбольшай велічыні бюджэту пражытачнага мінімуму ў сярэднім на душу насельніцтва, зацверджанага Саветам Міністраў Рэспублікі Беларусь, за два апошнія кварталы (далей БПМ);
на дзяцей ва ўзросце да 18 гадоў, інфіцыраваных вірусам імунадэфіцыту чалавека, — 70% БПМ;
на дзяцей, яким больш за тры гады – 50% БПМ;
па доглядзе інваліда першай групы, або асобы, якая дасягнула 80-гадовага ўзросту, — 100% БПМ, а пры адначасовым доглядзе двух і больш інвалідаў першай групы, або асобаў, якія дасягнулі 80-гадовага ўзросту, — 120% БПМ.
Г. ЧУРА,
начальнік раённага аддзела Фонду сацыяльнай абароны насельніцтва

Жыццё, на жаль, не абыходзіцца без надзвычайных сітуацый. Здараецца, яны адбываюцца па віне самога чалавека, яго бесклапотнасці. Здараецца, людзі становяцца заложнікам стыхіі, трагедыі. Але ў такіх выпадках на дапамогу пацярпелым прыходзяць ратаўнікі.
Напярэдадні іх прафесійнага свята карэспандэнты газеты наведалі пажарна-выратавальны пост №14, размешчаны ў Наваельні.
Сёння яго калектыў налічвае 14 чалавек. Стаж працы ў васьмі з іх складае 15 гадоў і больш.
– Старэйшыя работнікі перадаюць свой вопыт маладым, — гаворыць начальнік пажарнага паста, капітан унутранай службы, ратаўнік з 19-гадовым стажам Іван Губко
(фота 1). — Маладых спецыялістаў у нас чатыры. Усе яны працалюбівыя, старанныя. Адметна тое, што яны збіраюцца паступаць у вышэйшыя навучальныя ўстановы — Гомельскі інжынерны інстытут і Мінскі камандна-інжынерны інстытут па спецыяльнасці “інжынер па папярэджанні і ліквідацыі надзвычайных сітуацый”.
А, увогуле, як і ў любой прафесіі, вопыт прыходзіць з гадамі. Павышэнню кваліфікацыі садзейнічаюць і адпаведныя курсы ў Гродне.
– Калектыў у нас выдатны, — працягвае Іван Леанідавіч. — Яго людзі — гэта прафесіяналы. Яшчэ і цікавыя асобы. Напрыклад, Андрэй Шэнаеў і Сяргей Савасцюк іграюць у Наваельнянскім духавым аркестры. Аляксандр Ганчар — добры спартсмен. Удзельнічае ў спаборніцтвах па гіравым спорце, выступае нават за вобласць.
Адзначу і тое, што на нашым пажарным пасту ў свой час праходзілі службу Дзмітрый Гульнік, Уладзімір Стульба, Уладзімір Кажала — цяперашнія намеснікі начальніка раённага аддзела па надзвычайных сітуацыях.
З нагоды прафесійнага свята сваім калегам ратаўнікам, ветэранам жадаю здароўя, поспехаў, працягваць і памнажаць нашы лепшыя традыцыі.
НА ВАРЦЕ — ПЕРШАЯ ЗМЕНА
Яе ўзначальвае камандзір аддзялення, прапаршчык унутранай службы Аляксандр Трафімчык. Ён працуе ратаўніком з 1994 года. Дарэчы,  каля 10 гадоў ратаўніком прапрацаваў і яго бацька.
– Ён быў вадзіцелем пажарнага паста №14,  — гаворыць Аляксандр. — Бацька расказваў аб асаблівасцях прафесіі ратаўніка, у якую прыйшоў і я. Разам з бацькам я працаваў некалькі месяцаў. Пачынаць было складана. Самы цяжкі для мяне быў першы пажар, ліквідацыяй якога мне давялося кіраваць. Дапамагалі старэйшыя калегі па службе.
Дзяніс Болтач — старшы пажарны, сяржант унутранай службы, адзін з маладых спецыялістаў пажарнага паста №14. У прафесію ратаўніка, як і большасць яго калег, Дзяніс прыйшоў пасля арміі. Вайсковую службу праходзіў у паветрана-дэсантных войсках, у Мар’інай Горцы. Адно з патрабаванняў да салдат гэтага роду войскаў — выдатная фізічная падрыхтоўка. Са спортам Дзяніс на “ты” з малых гадоў. Са школы юнак займаўся лёгкай атлетыкай, у прыватнасці, бегам. У мінулым годзе ён ужо выступаў за раённы аддзел па надзвычайных сітуацыях на абласных спаборніцтвах, затым — на рэспубліканскіх. На абласных — Дзяніс паказаў другі вынік, на рэспубліканскіх — пяты.
Віталь Жыбко працуе вадзіцелем першай змены пажарнага паста. У прафесіі ратаўніка ён ужо 10 гадоў.
– Гэта — адзін з лепшых вадзіцеляў раённага аддзела па надзвычайных сітуацыях, — кажа пра свайго калегу Іван Губко. –  Ён — спецыяліст другога класа, мае допуск да пажарных аўтамабіляў усяго аддзела.
Увогуле, аўтамабілі, тэхніка з’яўляецца хобі Віталя Жыбко. Дарэчы, ратаўніком, таксама вадзіцелем, працуе і стрыечны брат Віталя — Юрый Баковіч. Ён — вадзіцель другой змены пажарнага паста №14.
Юрый Гізоўскі — пажарны, малодшы сяржант унутранай службы. Працуе ратаўніком нядаўна — яшчэ няма і года. Сваю прафесійную дзейнасць пачынаў з навучання на адпаведных курсах у Гродне. Але з прафесіяй ратаўніка пазнаёміўся яшчэ ў час вайсковай службы: быў вадзіцелем дзяжурнага пажарнага аўтамабіля. Расказваў яму аб асаблівасцях прафесіі і дзядзька — Генадзь Ляўкевіч, які працаваў камандзірам пажарнага аддзялення Навагрудскага раённага аддзела па надзвычайных сітуацыях.
Як і яго калега Дзяніс Болтач, Юра захапляецца спортам, у прыватнасці, валейболам. Хлопец выступаў у складзе школьнай каманды, а затым каманды Казлоўшчынскага ліцэя.
А. ДУБРОЎСКАЯ

Дабрачынная міласэрная акцыя адбылася 8 студзеня ў Гезгалаўскай бальніцы сястрынскага догляду.
У гэтай медыцынскай установе на пажыццёвае знаходжанне ўладкаваны адзінокія, нямоглыя, састарэлыя людзі з нашага Дзятлаўскага раёна. Іх 28 чалавек. Размешчаны яны ў добраўпарадкаваным памяшканні былога дзіцячага санаторыя “Ластаўка”. У кожнай з сямі палат знаходзяцца па чатыры чалавекі. Усюды — чыста, цёпла, утульна. У пакоях – ложкі з дабротнымі падушкамі і цёплымі коўдрамі.
Тут пад кіраўніцтвам доктара Яніны Іосіфаўны Кульгавеня працуюць медсёстры, санітаркі, работнікі кухні і іншы персанал. Работа нялёгкая, але такая неабходная.
Павіншаваць старых нямоглых людзей, калектыў бальніцы сястрынскага догляду сабралася царкоўнае сястрынства і пеўчыя. На другі дзень Калядаў, пасля службы ў царкве, сёстры разам са святаром царквы Міколы Цудатворцы вёскі Нагародавічы айцом Іаанам прыбылі ў гэтую ўстанову. Праходзячы па ўсіх палатах, наш святар віншаваў людзей з такім вялікім святам – з Нараджэннем Госпада нашага Ісуса Хрыста, са святам, якое ўшаноўваецца больш за 2000 гадоў. Айцец Іаан жадаў людзям бадзёрасці і здароўя, дабра і спагады. Ён падарыў усім пацыентам па невялікай іконцы Госпада альбо Божай Маці.